حنا نسريها مساري الذيابه

حنّا هل الفزعات مرخصْت الأعمار
نقلط على الموت الحمر مانهابه
رجّالنا لو هو على صالي النار
يصبر لو إن النار تحرق ثيابه
ورجالنا لا صار في الوقت ماصار
دون الخوي ياقف بعزم وصلابه
يومن رصيد اللاش في كثر الأعذار
حنا نسرّيها مساري الذيابه
ورجالنا يوم الوطن هجن ومهار
=فارس ويدفع في المعارك شبابه
يقلط على الهيجاء ولاهوب ينهار
الموت عنده والحياة متشابه
الليل والبيداء لنا سلم وشعار
والسيف والبندق بوقت المجابه
حنا السهول اللي مواقيقنا كبار
يفخر بنا التاريخ داخل كتابه
حنا وحنا للفخر عز وستار
يوم الردي ماحدٍ يحّسب حسابه
منا بني حمدان حماية الجار
كم غزوةٍ جابوا طمعها كسابه
وترى البرازي عند زوغات الأبصار
كم من عقيدٍ حولوا به طلابه
وترى الظهيري يحتمي الموقف الحار
 لا جا المزايد والقشر والنشابه
وترى ولد قبان قد جاله ادوار
كلٍ ذكر فعله ولابه غرابه
وابن على لا كتم الجو بغبار
رجالهم ياسعد منهو غزابه
والمنجلي لا صار مارد ومصدار
سيفٍ يقص العظم مضرب نصابه
وألاد ابن سلطان وافين الأشبار
رجالهم في الطيب كلٍ درابه
وترى الصعوب صعوب والعلم مقدار
 أخذ الخبر يامدورين الإجابه
وترى العبيد رجال وقروم وخيار
واللي نواهم عجل الله ذهابه
وانا محلفي من بعيدين الأنظار
أهل المحاجي فعلهم ينحكابه
لا نوخوا قدم المعادين و اندار
وابليس حضّر عدته مع زهابه
رجالهم يرخص حياته للأخطار
يوم إن بعض الناس فعله هبابه
يالابتي ياهل الوفاء سر وجهار
ياهل الفعول الطايله والحرابه
انتم هل الوقفات ماضين الأذكار
يوم الزمن مثل الريموت انقلابه
هذي عوايد لابتي يمين ويسار
يحق لي لا قلت من روس لابه
حتى بنات الفكر ماعاد تحتار
تدحم ليا من الوفاء فتح بابه
يشوش راسي يوم اغني بالأشعار
 ولا رحم أبو من لا يشوش وجنابه
والبندق اللي ماتجى قطر وعيار
في مدح ناسٍ مجدهم يقتدى به
بعها بوسط السوق من ضمن الأسعار
 لا خير في رجلٍ توانا ركابه
وكل القبايل عندها طيب وأخبار
وكلٍ حسب فعله يفصل ثيابه
واليوم ساعة حمد تضفي على الدار
صار الأسد والذيب ربع وقرابه
في ظل أبو متعب عسى ايامه كثار
يالله عسى لي دعوةٍ مستجابه
موجز بسيط ومختصر عبر الأقمار
وماكل من يتعب على الورد جابه
أزكى التحايا عدّ همال الأمطار
بالمسك والريحان عز ومهابه
تنصى بني عمي هل الطيب والكار
 أهل الحميا والظفر والذرابه
والمعذرة مرة وثنتين وأمرار
شاعر وأمثل عزوتي بالنيابه 

قصيدة للشاعر سعد بن تويم المحلفي السهلي

#الذيب #السهول #اهلالمحاجي #حناالسهول

0 views0 comments